పీఓకే ప్రధానిగా ఎన్నికల్లో ఓడిన అభ్యర్థి.. నవాజ్ షరీఫ్ ఆసక్తికర నిర్ణయం

పాక్ ఆక్రమిత కశ్మీర్ (పీఓకే) రాజకీయాల్లో ఒక కీలక పరిణామం చోటుచేసుకుంది. ఇటీవల జరిగిన అసెంబ్లీ ఎన్నికల్లో ఓటమి పాలైన పాకిస్థాన్ ముస్లిం లీగ్-నవాజ్ (పీఎంఎల్-ఎన్) నేత ఇఫ్తికార్ గిలానీని పీఓకే ప్రధాని అభ్యర్థిగా ఆ పార్టీ అధినేత నవాజ్ షరీఫ్ నామినేట్ చేశారు. ఈ విషయాన్ని పార్టీకి చెందిన ఒక సీనియర్ నేత నిన్న‌ వెల్లడించారు. నేడు జరగనున్న పీఓకే శాసనసభ సమావేశంలో ప్రధానిని అధికారికంగా ఎన్నుకోనున్నారు.

వృత్తిరీత్యా న్యాయవాది అయిన ఇఫ్తికార్ గిలానీ, ఇటీవలి ఎన్నికల్లో ముజఫరాబాద్ నియోజకవర్గం నుంచి పోటీ చేసి, పాకిస్థాన్ పీపుల్స్ పార్టీ (పీపీపీ) అభ్యర్థి సర్దార్ ముఖ్తార్ అహ్మద్ ఖాన్ అబ్బాసీ చేతిలో పరాజయం పాలయ్యారు. నవాజ్ షరీఫ్‌తో పాటు ఆయన కుమార్తె, పంజాబ్ ముఖ్యమంత్రి మరియం నవాజ్ స్వయంగా ప్రచారం నిర్వహించినప్పటికీ గిలానీ విజయం సాధించలేకపోయారు. అనంతరం టెక్నోక్రాట్ కోటాలో ఆయన అసెంబ్లీకి ఎన్నికయ్యారు. తాజాగా ఆయన ఏకంగా ప్రధాని పదవికి నామినేట్ కావడం ప్రాధాన్యత సంతరించుకుంది.

పీఓకే శాసనసభలో మొత్తం 53 స్థానాలు ఉన్నాయి. వీటిలో 45 స్థానాలకు ప్రత్యక్ష ఎన్నికల ద్వారా సభ్యులను ఎన్నుకోగా, మిగిలిన 8 స్థానాలను మహిళలు, టెక్నోక్రాట్లు, మత పెద్దలకు కేటాయించారు. మూడు దశల్లో జరిగిన ఈ ఎన్నికల సమయంలో హింసాత్మక నిరసనలు, భారీ స్థాయిలో రిగ్గింగ్ జరిగిందంటూ తీవ్ర ఆరోపణలు వెల్లువెత్తాయి.